Istas son as mías parolas d’introdución a la esposición fotografica Charrar ta no callar, d’a fotografa Cristina Raso. Se puede veyer en a Escuela Refuchio d’Alquezra dende o 6 d’aviento dica o 10 de chinero de 2026, d’as 9:00 t’as 22:00. A suya rematadura ferá parti d’os autos d’a IV Trobada d’Aragonés d’Alquezra.

Va escribir el poeta irlandés Seamus Heaney que heba naixiu al Norte on es ingleses heban acotolau la suya llengua y que, de gran, en un viache ta la costa oeste d’Irlanda va poder sentir como es nativos charraban gaelico irlandés. Y va vivir ixa experiencia con el goyo de recuperar la suya llengua propia, la llengua de la suya nación, d’es suyos abantpasaus.

Ara que se charra muito de dreitos culturals m’en acordo d’el poeta que sentiba feliz la mosicalidat d’aquella llengua de druidas y guerreros y ixo le feba sentirse part de la suya comunidat milenaria que ha sabiu pasar la suya cultura, la suya llengua, las suyas tradicions de cheneración en cheneración. Per ixo, cal dar las gracias a es parlladors patrimonials, a qui encara viven a es suyos llugars, a qui encara conserva la suya cultura, la suya identidat, la suya llengua, perque, cuan arriba el viachero y mos siente, puede experimentar el goyo de recuperar la suya llengua propia, la que vam mirar d’acotolar-mos fa sigllos, la que ha sobreviviu con tot y con ixo de la escuela franquista, de la represión, de cuan mos van fer marchar, de los embalses… Descubrir y trobar la mosicalidat d’una llengua que mos ha feito ser el Pueblo que som, de la nuestra cosmovisión, ixa forma unica de veyer y entender el mundo que tenim.

Manimenos, pa aconseguir ixo, l’atra barrera a superar é la vergüenya de charrar la nuestra llengua, el miedo a no fer servir el vocabulario, la gramatica u la grafia mes correctas. Pero cal parllar-la perque la unica llengua mal charrada é la que no se fa servir pas. Per ixo, fes servir la tuya llengua, fes servir esta llengua de toz es aragoneses y aragonesas y patrimonio de tota la humanidat. Per ixo, fes servir l’aragonés.

Jorge Pueyo Sanz